((( التوك توك و سنينه ))),

موضوعنا النهاردة موضوع عن شيء صغير في حجمه بس هوا أثار ممكن نقول ضجة كبيرة حوله من أول ما دخل مصر و انتشر في معظم المحافظات المصرية انتشار كبير و بسرعة هائلة و على الرغم من ايجابياته الا انه ليه سلبيات كتير و معظمها بتخص طبقة الشباب ( ومش هنقول كل الشباب لأ معظم الشباب و خصوصا الشباب المستهتر )
الموضوع بتاعي النهـــاردة عن .... التوك توك ...

التوك توك وما ادراك ما التوك التوك توك ( وفي رواية اخرى الدودو ) انه تلك الخنفساء التي تسير على ثلاث عجلات وتشعر انك اذ تركبه انك في هودج الا انه يختلف عن هودج الجاهليه في تكنولوجيته فالتوك توك هودج له موتور وكاسيت وسقف فيبر كمان
التوك توك وما ادراك ما التوك التوك توك ( وفي رواية اخرى الدودو ) انه تلك الالة التي تغنى في مديحها اعظم الشعراء وابلغهم وافصحهم حين قال طرفة العبد يا توك توك يا صغير كل الناس حبوك *** بتمشي ف كل حته والناس بيستنوك
التوك توك وما ادراك ما التوك التوك توك ( وفي رواية اخرى الدودو ) انه تلك الالة التي كثر حولها الجدل والقيل والقال والموافقه والرفض والطبيخ والبطيخ

فتارة تسمع ان سائقي التوك توك خمورجية ليس لهم هم الا معاكسة بنات الناس واستخدام التوك توك لاغراض دنيئه
وتارة اخرى تسمع ان التوك توك وفر الكثير جدا من فرص العمل فاصبح بامكان الشاب بدلا من ان يعمل في شركة ( اركن ) انه يشتري توك توك ويشتغل عليه
وتارة ثالثه تسمع ان التوك توك سبب الحوادث والمصايب والبلا الازرق اللي بيحصل في الشوارع بسبب تعور سائقيه اللي هما ماهم في الاصل الا بعض المراهقين والطائشين
وتارة رابعه ان التوك توك قد سهل الحركه جدا خصوصا في الاقاليم التي لا تتوفر بها سيارات الاجرة ( تاكسي ) وبدل ما كان البني ادم بيدب مشوار نص ساعه ولا ساعه وشايل عشرة عشرين كيلو اصبح بامكانه بقى ممكن ياخد توك توك بجنيه ويريح نفسه
وقد مر التوك توك توك على مر العصور والازمان المختلفه منذ ظهوره في القرون الغابرة وتحديدا منذ بدايو ظهوره عام 2004 بمراحل تطور مختلفه وسريعه جدا ومتقدمه للغايه حتى اصبحت او كادت تضاهي تطور عدد العاطلين عن العمل وفيروز في تطورها الطبيعي للحاجه الساقعه
عندما ظهر التوك توك لاول مرة لم يكن الا موتوسيكل يحيط به صندوق اسود ( غير بتاع ادهم صبري ) اعلاه جلد واسفله صاج ثم بدا الصندوق يتلون بالوان مختلفه

ثم بدات تظهر عليه كتابات بسيطه
وبعد مراحل عديده لا داعي لشرحها اصبح التوك توك الان عبارة عن ( كوشة )صغيره فهو مليء بالزينه والالعاب الصغيره والعبارات والزخارف والانوار كوشه كوشه يعني بس بتمشي بعجل
وسقف التوك توك لوحده حكايه ( الفيبر طبعا لان الجلد انقرض تماما من سنتين ) فهو دائما ملئ بالعبارات والحكم
وياسلام على حكم التوك توك تجدها متباينه في التكاتك ( ان صح هذا الجمع ) ف تجد احيانا بعض الحكم الروشة طحن على غرار

( حب ايه يا جاهل مفيش بنت تستاهل )

واحيانا اخرى تكون حكم حكيمه زي

( مالك الملك اذا وهب فلا تسألن عن السبب )

( احيانا بتيجي في بالي فكرة ان احنا لو عملنا منتدى لسواقين التوك توك هينتشر بينهم اوي موضوع شخصيتك من حكمة توك توكك )

لكن اصلا غالبا ( ان لم يكن دايما ) بيكون سواق التوك توك خابط العباره دي من غير ما يفهمها ( دا لو كان قراها أصلا )

يعني ما تستغربش لو لقيت توك توك مليان من بره ادعيه وايات قرآنيه ومواعظ دينيه ومن جوه مشغل دي جي موصل لحلايب وشلاتين على ( بحبك يا حمار ) او ( البانجو ده مش بتاعي )

وسواق التوك توك لوحده ( زي اي سواق في الدنيا مشكله ) مشكله عويصه لو جربت تصاحبه يوم هتطلع عينك ومش هتخلص منه ومن مواضيعه وحكاياته يوم ما قلب بالتوك توك ولا يوم ما طلع بيه ع السريع بس بجد اجمد موقف كان يوم ما هرب من اللجنه ساعة اما طلع بيه طلعة

ولا الطلعه الجوية بتاعت حسحس في 6 اكتوبر ( منها لله الطلعه دي لو كنا هنعرف اللي هيحصل بعدها مكناش حاربنا في 6 اكتوبر من اساسه )

حكاوي كلها مملة ومكررة ورتيبه وهو بيحس وهو بيحكيها انه عنتر زمانه وفارس عصره واوانه
بس انت في النقطة دي ماتلومهمش لان من شابه رئيسه فما ظلم انت بالتأكيد واجهت مواقف كتير مع تكاتك في حياتك ( الا لو مكنش في ف بلدك توك توك )

مواقف ما تنسهاش مواقف ممكن تنرفزك او تضحكك او ... او ... وبالتأكيد كمان شوفت كتير ولفت انتباهك كتير من حكم التوك توك دي وانا من هذا المزنق التاريخي بادعو كل كتكوت وكتكوته للادلاء برأيه حول التوك توك
هل انت مع ولا ضد انتشاره ؟
هل انت شايفه مفيد ولا ضار ؟
هل هو فعلا سبب من اسباب الجرايم والحوادث ؟
ام انه قد وفر المواصلات وفرص العمل ؟
هل هو فكرة ناجحه ولا فاشله ؟
هل حصل لك موقف ما تنساهوش مع توك توك قبل كده ؟ وايه هو ؟
بس الاهم من الهلاهل دي كلها لازم قبل ما تطلع تسيب لنا حكمة قابلتك
من حكم التوك توك